Heb 8 | PWG | STEP | Sisiya aberaberai na iyamna vaghata na weni. Tota ita suwara kapuna badana ghamana na kunumai, God ghamanakina kadakadarina katagheyanai emakamakai.

a 8:1Psa 110:1

b 8:5Exod 25:40

d 8:8-12Jer 31:31-34

Hebrews 8

Yesu na ita suwara kapuna badana ghamana.

1 Sisiya aberaberai na iyamna vaghata na weni. Tota ita suwara kapuna badana ghamana na kunumai, God ghamanakina kadakadarina katagheyanai emakamakai. ^a 2 Ma tuna yobe vovokaravina kamonai God ina biga eberaberai. Ma nani yobena na vokavara kana gawara vaghata. Ke wawayota ita vowai ma Bada tuna mani ivowai.

3 Suwara kapuna babadisi evinevinesi na i biga da God kurina ina puyo ma suwara ina kapuna. Tuna kubiine na ita suwara kapuna badana ghamana Yesu na bade nakanani, ina biga da God kurina isuwara. 4 Mikeda dobuwai ita makamakai na ke kovokovoghina da suwara kapuna bigana ita berai, iyamna namada suwara kapuna babadisi imakamakai da Moses ina vonaviyoyovana ikikava evonavona na nakanani esuwasuwara. 5 Bera vaghata na kunumai. Ma dobuwai suwara kapuna babadisi biga eberaberai na imatakira da aviyavisina kunumai emakamakai, tuna ibonebonei. Berana sago Moses iberai. Maranai yobe vovokaravina ita vowai na God ivonei bo, “Kebera bubuni da aviyavisina koya tepanai avi beyem kukitai na tuna kava kevi gubegubei.” ^b 6 Ma karako na God namada Yesu ivinei da suwara kapuna bigana ita berai. Nani bigana kamonai vivaghina makamakiina vuna ekivikivini da iyamna irakata kirakai, ke me suwara kapuna babadisi viya nakanani. Ti na vivaghina katamanina ekivikivini. Ma Yesu kubiita keta ivotawei da ina Mamai kurina. Tuna ketana na ibiibii kirakai, ke me keta katamanina nakanani, iyamna ina vonakiiyapa vusi na vonakiiyapa katamanisi ighekuyowei.

7 Ma mikeda vivaghina katamanina na maninina kavakava na avi kubiine vivaghina viruwina ita vokiibuwei da katamanina kana gawara ita viiya? 8 Ma katamanina na ke ita biibii kirakai, iyamna God ina wawaya ivi kiigiiyei da iwavusi. Tuna kubiine weni nakanani ivi sisiya,

“Bada ivona bo, ‘Mara karakava epipisi da Juda damsi
ma Israel damsi yavata vivaghina makamakiina vuna kana berai. ^{▼▼8:8 Israel ma Juda:Kiivavo Soromon ina rabobo murinai Jiu damsi kamosiyai ivi ghaviya da iyi ini kiivavo ma ivi bogebogesi da i dobu ruwa. Sago kana vava Israel ma sago kana vava Juda. Ma patana da nakanani imakamakai maranai Jerimaya weni sisiyina igirumi 1Kgs 11 ma 2Chr 10 kamonai kuni yavi.}
9 Weni vivaghinina na bogiiyai, ke nani vivaghinina i kaekiki mau yavata kaberai nakanani.
Tuna maranai arutina bubunisi da Egypt dobuna ikiibutawei.
Nani vivaghinina yavata kaberai na ivi kiigiiyei,
tuna kubiine na akitatawesi.’
10 ‘Mara epipisi da Israel damsi yavata vivaghina makamakiina weni nakanani kana berai,
Aku vonaviyoyovana ku gayamisi ana terei,
ma nuwanuwasiyai ana girumi.
Taku na i God,
ma ti na aku wawaya.’
11 Ma ke meni wawayina ina vomiiri da kwinana bo dam turana ini beyebeyena kurina da ina vona bo,
‘Bada kutakovi,’
Iyamna wawaya kudubisi,
Kiikayokayona da ku wawaya ghamana na inakova yavuku.
12 Ma i berabero ana notatawei,
nuwanuwaku ina wapa da ke meyani ana nota meyei.” ^d
13 God vivaghina makamakiina vuna isisiyei na imatakira da katamanina kana mara ekovikovi. Ma aviyavisina ina wadubo ma ina siru na gisina kava ina wapa.